Tatra bhikṣavaḥ katamāni pañcendriyāṇi?

Yad-uta:

1. Śraddhendriyam |
2. vīryendriyam |
3. smṛtīndriyam |
4. samādhīndriyam |
5. prajñendriyam ||

1. Tatra katamat śraddhendriyam?

   Yayā śraddhayā caturo dharmān śraddadhāti ||

   Katamāṁś-caturaḥ?

   1. Saṁsārāvacarāṁ laukikīṁ samyag-dṛṣṭiṁ śraddadhāti |
   2. sa karma-vipāka-pratiśaraṇo bhavati |
   3. yad-yad-eva karma kariṣyāmi kalyāṇaṁ vā pāpakaṁ vā | tasyaiva karmaṇo vipākaṁ pratisaṁvedayiṣyāmi |
   4. sa jīvita-hetor-api pāpakaṁ karma nābhisaṁskaroti ||

   Idam-ucyate śraddhendriyam ||

2. Tatra katamad vīryendriyam?

   Yān dharmān śraddhendriyeṇa śraddadhāti | tān dharmān vīryendriyeṇa samudānayati ||

   Idam-ucyate vīryendriyam ||

3. Tatra katamat smṛtīndriyam?

   Yān dharmān vīryendriyeṇa samudānayati | tān dharmān smṛtīndriyeṇa na vipraṇāśayati ||

   Idam-ucyate smṛtīndriyam ||

4. Tatra katamat samādhīndriyam?

   Yān dharmān smṛtīndriyeṇa na vipraṇāśayati | tān dharmān samādhīndriyeṇa ekāgrīkaroti ||

   Idam-ucyate samādhīndriyam ||

5. Tatra katamat prajñendriyam?

   Yān dharmān samādhīndriyeṇa ekāgrīkaroti | tān dharmān prajñendriyeṇa pratividhyate sa teṣu dharmeṣu pratyavekṣaṇa-jātīyo bhavati ||

   Idam-ucyate prajñendriyam ||

Imāni bhikṣavaḥ pañcendriyāṇi ||