avidyayā nivṛtasya bālasya tṛṣṇayā saṃyuktasyaivam ayam bālasyāśrutavataḥ pṛthagjanasya savijñānakaḥ kāyaḥ samudāgataḥ | ity ayañ cāsya savijñānakaḥ kāyo bahirdhā ca nāmarūpam | evaṃ dvayam |

dvayaṃ khalu pratītya sparśaḥ | ṣaḍ imāni sparśāyatanāni yaiḥ spṛṣṭaḥ spṛṣṭo bālo ’śrutavān pṛthagjanaḥ sukhaduḥkhaṃ pratisaṃvedayati | ato vā punar upādāyaiteṣāṃ vānyatamena |

katamāni ṣaṭ | cakṣuḥ sparśāyatanam | śrotraṃ ghrāṇaṃ jihvā kāyo manaḥ sparśāyatanam |

avidyayā nivṛtasya paṇḍitasya tṛṣṇayā saṃyuktasyaivam ayam paṇḍitasya savijñānakaḥ kāyaḥ samudāgataḥ | ity ayañ cāsya savijñānakaḥ kāyo bahirdhā ca nāmarūpam | evaṃ dvayam |

dvayaṃ khalu pratītya sparśaḥ | ṣaḍ imāni sparśā­yatanāni yaiḥ spṛṣṭaḥ spṛṣṭaḥ paṇḍitaḥ sukhaduḥkhaṃ pratisaṃvedayati | ato vā punar upādāyaiteṣāṃ vānyatamena |

katamāni ṣaṭ | cakṣuḥ sparśāyatanaṃ śrotraṃ ghrāṇaṃ jihvā kāyo manaḥ |

iti bhikṣavo ko viśesaḥ ko ’bhiprāyaḥ kin nānākaraṇaṃ bālapaṇḍitayor mamāntike brahmacaryavāsāya |

bhagavanmūlakā bhadanta dharmāḥ pūrvavad yāvad bhāṣiṣye |

yayāvidyayā nivṛtasya bālasyāśrutavataḥ pṛthagjanasya yayā ca tṛṣṇayā saṃyuktasyāyaṃ savijñānakaḥ kāyaḥ samudāgatas tasya sā ca avidyā aprahīṇā sā ca tṛṣṇā aparikṣīṇā | sa tasyā avidyāyā aprahāṇāt tasyāś ca tṛṣṇāyā aparikṣayāt kāyasya bhedāt paraṃmaraṇāt kāyopago bhavati | sa kāyopagaḥ san na parimucyate jāti­jarāv­yādhi­maraṇa­śoka­pari­deva­duḥkha­daurmanasyopāyāsebhyaḥ | na parimucyate duḥkhād iti vadāmi |

tat kasmād dhetoḥ | nācārṣīd bālaḥ pūrve brahmacaryeṣaṇāṃ samyagduḥkhakṣayāya duḥkhasyāntakriyāyai | tasmāt sa kāyasya bhedāt paraṃmaraṇāt kāyopago bhavati | sa kāyopagaḥ san na parimucyate pūrvavad yāvad duḥkhād iti vadāmi |

yayā nv avidyayā nivṛtasya paṇḍitasya yayā ca tṛṣṇayā samyuktasya savijñānakaḥ kāyaḥ samudāgatas tasya sā ca avidyā prahīṇā sā ca tṛṣṇā parikṣīṇā | sa tasyā avidyāyāḥ prahāṇāt tasyāś ca tṛṣṇāyāḥ parikṣayāt kāyasya bhedāt paraṃmaraṇān na kāyopago bhavati | sa na kāyopagaḥ san parimucyate jāti­jarāv­yādhi­maraṇa­śoka­pari­deva­duḥkha­daurmanasyopāyāsebhyaḥ | parimucyate duḥkhād iti vadāmi |

tat kasmād dhetoḥ | acārṣīt paṇḍitaḥ pūrve brahmacaryeṣaṇāṃ samyagduḥkhakṣayāya duḥkhasyāntakriyāyai | tasmāt sa kāyasya bhedāt paraṃmaraṇān na kāyopago bhavati | sa na kāyopagaḥ san parimucyate pūrvavad yāvad duḥkhād iti vadāmi |

ayaṃ bhikṣavo viśeṣo ’yam abhiprāya idan nānākaraṇaṃ bālapaṇḍitayor mamāntike brahmacaryavāsāya ||