anyataro brāhmaṇo yena bhagavāṃs tenopajagāma | upetya bhagavatā sārdhaṃ sammodanīṃ saṃrañjanīṃ kathāṃ vividhāṃ upasaṃhṛtyaikānte nyaṣīdat | ekāntaniṣaṇṇaḥ sa brāhmaṇo bhagavantam idam avocat |

kin nu bho gautama sa karoti sa pratisaṃvedayati | avyākṛtam idaṃ brāhmaṇa mayā sa karoti sa pratisaṃvedayati |

kin nu bho gautama anyaḥ karoty anyaḥ pratisaṃvedayati | etad api brāhmaṇa avyākṛtaṃ mayā anyaḥ karoty anyaḥ pratisaṃvedayati |

kin nu bho gautama sa karoti sa prati­saṃ­vedayatīti pṛṣṭo avyākṛtam iti vadasi | anyaḥ karoty anyaḥ pratisaṃvedayatīti pṛṣṭo avyākṛtam iti vadasi | ko nu bho gautama asya bhāṣitasyārtho draṣṭavyaḥ |

sa karoti sa pratisaṃvedayatīti brāhmaṇa śāśvatatve paraiti | anyaḥ karoty anyaḥ pratisaṃvedayatīty ucchede paraiti |

ity etāv ubhāv antāv anupagamya madhyamayā pratipadā tathāgato dharmaṃ deśayati |

yadutāsmin satīdaṃ bhavaty asyotpādād idam utpadyate | yadutāvidyāpratyayāḥ saṃskārā iti yāvat samudayo nirodhaś ca bhavati |