rājagṛhe nidānam |

atha śroṇo gṛhapatiputro divādinam eva jaṃ­ghāvihāreṇānucaṃ­kramyamāṇo ’nuvicaran pādābhyām eva gṛdhrakūṭaparvatam abhiruhya yenāyuṣmāṃc chāriputras tenopasaṃkrānta | upasaṃkramyāyuṣmanaḥ śāriputrasya pādau śirasā vanditvaikānte niṣaṇṇaḥ | ekānte niṣaṇṇaṃ śroṇaṃ gṛhapatiputram āyusmāṃc chāriputra idam avocat |

ye ke cic chroṇa śramaṇā vā brāhmaṇā vā rūpaṃ yathābhūtaṃ na prajānanti rūpasamudayaṃ rūpanirodhaṃ rūpanirodhagāminīṃ pratipadaṃ yathābhūtaṃ na prajānanty abhavyās te śroṇa śramaṇā vā brāhmaṇā vā tad rūpaṃ parijñātuṃ |

ye ke cic chroṇa śramaṇā vā brāhmaṇā vā vedanāṃ saṃjñām saṃskārān vijñānaṃ yathābhūtaṃ na prajānanti vijñānasamudayaṃ vijñānanirodhaṃ vijñānanirodhagāminīṃ pratipadaṃ yathābhūtaṃ na prajānanty abhavyās te śroṇa śramaṇā vā brāhmaṇā vā tad vijñānaṃ parijñātuṃ |

ye tu ke cic chroṇa śramaṇā vā brāhmaṇā vā rūpaṃ yathābhūtaṃ prajānanti | rūpasamudayaṃ rūpanirodhaṃ rūpanirodhagāminīṃ pratipadaṃ yathābhūtaṃ prajānanti | bhavyās te śroṇa śramaṇā vā brāhmaṇā vā tad rūpaṃ parijñātum |

ye tu ke cic chroṇa śramaṇā vā brāhmaṇā vā vedanāṃ saṃjñāṃ saṃskārān vijñānaṃ yathābhūtaṃ prajānanti vijñānasamudayaṃ vijñānanirodhaṃ vijñānanirodhagāminīṃ pratipadaṃ yathābhūtaṃ prajānanti bhavyās te śroṇa śramaṇā vā brāhmaṇā vā tad vijñānaṃ parijñātum |

kiṃ manyase śroṇa rūpaṃ nityaṃ vā anityaṃ vā |

anityam idaṃ bhadanta śāriputra …