Tatra katamāni (bhikṣavaś-)catvāri srota-āpattyaṅgāni?

1. Iha [bhikṣava] āryaśrāvako Buddhe ’vetyaprasādena samanvāgato bhavati:

   Ity-api sa Bhagavāṁs-Tathāgato ’rhan Samyak-Saṁbuddho | vidyā-caraṇa-saṁpannaḥ Sugato lokavid-anuttaraḥ puruṣa-damya-sārathiḥ | Śāstā devānāṁ ca manuṣyāṇāṁ ca Buddho Bhagavān-[iti] ||

2. Dharme ’vetyaprasādena samanvāgato bhavati:

   Svākhyāto Bhagavatā dharmaḥ | sāṁdṛṣṭiko nirjvara ākālika aupanāyika ehipaśyakaḥ | pratyātmavedyo vijñaiḥ | yad-uta, madanirmadanaḥ pipāsā-prativinayaḥ | ālaya-samuddhātaḥ dharmopacchedaḥ śūnyatopalambhaḥ | tṛṣṇā-kṣayaḥ virāgaḥ nirodhaḥ Nirvāṇam ||

3. Saṁghe ’vetyaprasādena samanvāgato bhavati:

   Su-pratipanno bhagavataḥ śrāvaka-saṁghaḥ | nyāya-pratipannaḥ… ṛjudṛṣṭi-pratipannaḥ… sāmīcī-pratipannaḥ | Dharmānudharma-pratipannaḥ, anudharmacārī ||

   Santi Saṁghe srota-āpatti-phala-sākṣāt-kriyāyai pratipannakāḥ | santi Saṁghe srota-āpannāḥ | santi Saṁghe sakṛdāgāmi-phala-sākṣāt-kriyāyai pratipannakāḥ | santi Saṁghe sakṛdāgāminaḥ | santi Saṁghe anāgāmi-phala-sākṣāt-kriyāyai pratipannakāḥ | santi Saṁghe anāgāmināḥ | santi Saṁghe Arhattva-phala-sākṣāt-kriyāyai pratipannakāḥ | santi Saṁghe Arhantaḥ | yad-uta, catvāri puruṣa-yugāni, aṣṭau puruṣa-pudgalāḥ | eṣa Bhagavataḥ śrāvaka-saṁghaḥ | śīla-sampannaḥ, samādhi-saṁpannaḥ, prajñāsampannaḥ | śraddhā-saṁpannaḥ, śruta-saṁpannaḥ | vimukti-saṁpannaḥ, vimukti-jñāna-darśana-saṁpannaḥ | āhavanīyaḥ, prāhavanīyaḥ, añjalīkaraṇīyaḥ, sāmīcikaraṇīyaḥ | anuttaraṁ puṇya-kṣetraṁ darśaṇīyo lokasya ||

4. Ārya-kāntaiḥ śīlaiḥ samanvāgato bhavati:

   Yāni ca tāni śīlāni akhaṇḍāni, acchidrāṇi | aśabalāni, akalmāṣāṇi, bhujiṣyāṇi, aparāmṛṣṭāni | susamāptāni susamārabdhāni | vijña-praśastāni, agarhitāni ca vijñair-[iti] ||

Imāni bhikṣavaś-catvāri srota-āpattyaṅgāni ||