tatra bhagavān āyuṣmantaṃ śāriputram āmantrayati |

uktam idaṃ śāriputra mayā parāyaṇeṣv ajitapraśneṣu |

ye ca saṅkhyātadharmāṇi ye ca śaikṣāḥ pṛthagvidhāḥ | teṣāṃ me nipakasyeryāṃ pṛṣṭaḥ prabrūhi māriṣa || ||

ke śāriputra śaikṣāḥ ke ca saṅkhyātadharmāṇi |

evam ukta āyuṣmāñ chāriputras tūṣṇī |

dvir api trir api bhagavān āyuṣmantaṃ śāriputram idam avocat |

uktam idaṃ śāriputra mayā parāyaṇesv ajitapraśneṣu |

ye ca saṅkhyātadharmāḥ pūrvavat |

dvir api trir apy āyuṣmāñ chāriputras tūṣṇīm abhūt |

tatra bhagavān āyuṣmantaṃ śāriputram āmantrayati |

bhūtam idaṃ śāriputra |

evam etad bhūtaṃ bhadanta | bhūtasya bhadanta bhikṣur nirvide virāgāya nirodhāya pratipanno bhavati |

tadāhārasaṃbhavaḥ | tadāhārasaṃbhavasya bhikṣur nirvide virāgāya nirodhāya pratipanno bhavati |

tadāhāranirodha iti | yad bhūtaṃ tan nirodhadharmam iti viditvā nirodhadharmasya bhikṣur nirvide virāgāya nirodhāya pratipanno bhavati |

ima ucyante śaikṣāḥ |

bhūtam idaṃ śāriputra |

evam etad bhūtaṃ bhadanta | bhūtasya bhadanta bhikṣur nirvide virāgāya nirodhāyānu­pād­āyāsravebhyaḥ samyaksuvimuktacitto bhavati |

tadāhārasaṃbhavaḥ | tadāhārasaṃbhavasya bhikṣur nirvide virāgāya nirodhāyānupād­āyāsravebhyaḥ samyaksuvimuktacitto bhavati |

tadāhāranirodha iti | yad bhūtaṃ tan nirodhadharmam iti viditvā nirodhadharmasya bhikṣur nirvide virāgāya nirodhāyānu­pād­āyāsravebhyaḥ samyaksuvimuktacitto bhavati |

ima ucyante saṅkhyāta­dharmāṇaḥ |

evam etac cchāriputra bhūtam | evam etac cchāriputra bhūtasya bhikṣur nirvide virāgāya pūrvavad yāvat saṅkhyāta­dharmāṇaḥ |

atha bhagavān utthāyāsanād vihāraṃ prāviśat pratisaṃlayanāya |

athāyuṣmāñ chāriputro ’ciraprakrāntaṃ bhagavantaṃ viditvā bhikṣūn āmantrayati |

aprati­saṃ­viditaṃ mām āyuṣmanto bhagavān etaṃ prathamaṃ praśnaṃ pṛṣṭavān | tasya me ’bhūd apūrvaṃ dhandhāyitatvam |

yataś ca me bhagavāṃs tat prathamaṃ praśnavyākaraṇam abhyanumoditavān tasya me etad abhavat |

sacet kevalikāṃ rātriṃ bhagavān etam evārtham anyaiḥ padair anyair vyañjanaiḥ praśnaṃ pṛcchet kevalikām apy ahaṃ rātriṃ bhagavata etam evārtham anyaiḥ padair anyair vyañjanaiḥ praśnaṃ pṛṣṭo vyākuryām |

saced ekam divasam | ekaṃ rātridivasam | saptāpi rātridivasāni bhagavān mām etam evārtham anyaiḥ padair anyair vyañjanaiḥ praśnaṃ pṛcchet | saptāpy ahaṃ rātridivasāni bhagavata etam evārtham anyaiḥ padair anyair vyañjanaiḥ praśnaṃ pṛṣṭo vyākuryām |

athānyataro bhikṣur yena bhagavāṃs tenopajagāma | upetya bhagavatpādau śirasā vanditvaikānte ’sthāt | ekāntasthitaḥ sa bhikṣur bhagavantam idam avocat |

āyuṣmatā bhadanta śāriputreṇa udārārṣahī vāg bhāṣitaikāṃ­śa udgṛhītaḥ pariṣadi samyaksiṃhanādo nāditaḥ |

apratisaṃviditaṃ mām āyuṣmanto bhagavān etaṃ pūrvavat |

sacet kevalikām apy ahaṃ rātrim āyuṣmantaṃ śāriputram etam evārtham anyaiḥ padair anyair vyañjanaiḥ praśnaṃ pṛccheyaṃ yāvat saptāpi rātridivasāni śāriputra etam evārtham anyaiḥ padair anyair vyañjanaiḥ praśnaṃ pṛṣṭo vyākuryāt |

tathā hi śāriputrasya bhikṣor dharmadhātuḥ supratividdhaḥ |