chindhi srotaḥ parākramya
kāmāṃ praṇuda sarvaśaḥ |
nāprahāya muniḥ kāmān
ekatvam adhigacchati || 1

kurvāṇo hi sadā prājño
dṛḍham eva parākramet |
śithilā khalu pravrajyā
hy ādadāti puno rajaḥ || 2

yat kiṃ cic chithilaṃ karma
saṃkliṣṭaṃ vāpi yat tapaḥ |
apariśuddhaṃ brahmacaryaṃ
ha tad bhavati mahāphalam || 3

śaro yathā durgṛhīto
hastam evāpakṛntati |
śrāmaṇyaṃ duṣparāmṛṣṭaṃ
narakān upakarṣati || 4

śaro yathā sugṛhīto
na hastam apakṛntati |
śrāmaṇyaṃ suparāmṛṣṭaṃ
nirvāṇasyaiva so ’ntike || 5

duṣkaraṃ dustitīkṣaṃ ca
śrāmaṇyaṃ mandabuddhinā |
bahavas tatra saṃbādhā
yatra mando viṣīdati || 6

śrāmaṇye carate yas tu
svacittam anivārayet |
punaḥ punar viṣīdet sa
saṃkalpānām vaśaṃ gataḥ || 7

duṣpravrajyaṃ durabhi­ramaṃ
duradhyāvasitā gṛhāḥ |
duḥkhāsamānasaṃvāsā
duḥkhāś copacitā bhavāḥ || 8

kāṣāyakaṇṭhā bahavaḥ
papadharmā hy asaṃyatāḥ |
pāpā hi karmabhiḥ pāpair
ito gacchanti durgatim || 9

yo ’sāv atyantaduḥśīlaḥ
sālavāṃ mālutā yathā |
karoty asau tathātmānaṃ
yathainaṃ dviṣa-d icchati || 10

sthaviro na tāvatā bhavati
yāvatā palitaṃ śiraḥ |
paripakvaṃ vayas tasya
mohajīrṇaḥ sa ucyate || 11

yas tu puṇyaṃ ca pāpaṃ ca
prahāya brahmacaryavān |
viśreṇayitvā carati
sa vai sthavira ucyate || 12

na muṇḍabhāvāc chramaṇo
hy avṛtas tv anṛtaṃ vadan |
icchālobhasamāpannaḥ
śramaṇaḥ kiṃ bhaviṣyati || 13

na muṇḍabhāvāc chramaṇo
hy avṛtas tv anṛtaṃ vadan |
śamitaṃ yena pāpaṃ syād
aṇusthūlaṃ hi sarvaśaḥ |
śamitatvāt tu pāpānāṃ
śramaṇo hi nirucyate || 14

brāhmaṇo vāhitaiḥ pāpaiḥ
śramaṇaḥ śamitāśubhaḥ |
pravrājayitvā tu malān
uktaḥ pravrajitas tv iha || 15

|| sramaṇavargaḥ || ||