sraddhātha hrīśīlam1athāpi dānaṃ
dharmā ime satpuruṣapraśastāḥ |
etaṃ hi mārgaṃ divyaṃ vadanti
etenāsau gacchati devalokam || 1

na vai kadaryā devalokaṃ vrajanti
bālā hi te na praśaṃsanti dānaṃ |
śrāddhas tu dānaṃ hy anumodamāno
’py evaṃ hy asau bhavati sukhī paratra || 2

śraddhā hi vittaṃ puruṣasya śreṣṭhaṃ
dharmaḥ sucīrṇaḥ sukham ādadhāti |
satyaṃ hi vai svādutamaṃ rasānāṃ
prajñajīvi jīvināṃ śreṣṭha uktaḥ || 3

śraddhādhano hy arhatāṃ
dharmaṃ nirvāṇaprāptaye |
śuśruṣur labhate prajñāṃ
tatra tatra vicakṣaṇaḥ || 4

śraddhayā tarati hy oghaṃ
apramādena cārṇavam |
vīryeṇa tyajate duḥkhaṃ
prajñayā parisudhyate || 5

śraddhā dvitīyā puruṣasya bhavati
prajñā cainaṃ praśāsati |
nirvāṇābhirato bhikṣuś
chinatti bhavabandhanam || 6

yasya śraddhā ca śīlaṃ caiv
āhiṃsā saṃyamo damaḥ |
sa vāntadoṣo medhāvī
sādhurūpo nirucyate || 7

śrāddhaḥ śīlena saṃpannas
tyāgavāṃ vītamatsaraḥ |
vrajate yatra yatraiva
tatra tatraiva pūjyate || 8

yo jīvaloke labhate
śraddhāṃ prajñāṃ ca paṇḍitaḥ |
tad dhi tasya dhanaṃ śreṣṭhaṃ
hīnam asyetarad dhanam || 9

āryāṇāṃ darsanaḥ kāmaḥ
saddharmaśravaṇe rataḥ |
vinītamātsaryamalaḥ
sa vai śrāddho nirucyate || 10

śrāddho gṛhṇati pātheyaṃ
puṇyaṃ coraiḥ sudurharaṃ |
coraṃ harantaṃ vārayati
harantaḥ śramanāḥ priyāḥ |
śramaṇān āgatāṃ dṛṣṭvā
abhinandanti paṇḍitāḥ || 11

dadanty eke yathā śraddhā
yathāvibhavato janāḥ |
tatra yo durmanā bhavati
pareṣāṃ pānabhojane |
nāsau divā ca ratrau ca
samādhim adhigacchati || 12

yasya tv ete samucchinnās
tālamastakavad dhatāḥ |
sa vai divā ca rātrau ca
samadhim adhigacchati || 13

vītaśraddhaṃ na seveta
hradaṃ yadvad dhi nirjalam |
sa cet khanel labhet tatra
vāri kardamagandhikam || 14

śrāddhaṃ prājñaṃ tu seveta
hradaṃ yadvaj jalārthikaḥ |
acchodakaṃ viprasannaṃ
śītatoyam anāvilam || 15

nānurakta iti rajyeta
hy atra vai dīryate janaḥ |
aprasannāṃ varjayitvā
prasannān upasevate || 16

|| śraddhāvargaḥ || ||

uddānam ||
anityakāmaṭṛṣṇā ca
apramādas tathā priyaḥ |
śīlaṃ sucaritaṃ vāca
karmaśraddhā ca te daśaḥ || ||