ānāpānasmṛtir yasya
paripūrnā subhāvitā |
anupūrvaṃ parijitā
yathā buddhena deśitā |
sa imaṃ bhāsate lokaṃ
abhramuktaiva candramāḥ || 1

sthitena kāyena tathaiva cetasā
sthito niṣaṇṇo ’py atha vā śayānaḥ |
nityaṃ smṛto bhikṣur adhiṣṭhamāno
labheta pūrvāparato viśeṣaṃ |
labdhvā ca pūrvāparato viśeṣam
adarśanaṃ mṛtyurājasya gacchet || 2

smṛtiḥ kāyagatā nityaṃ
saṃ­varaś cendriyaiḥ sadā |
samāhitaḥ sa jānīyat
tena nirvāṇam ātmanaḥ || 3

yasya syāt sarvataḥ smṛtiḥ
satataṃ kāyagatā hy upasthitā
no ca syān no ca me syān
na bhaviṣyati na ca me bhaviṣyati |
anupūrvavihāravān asau
kālenottarate viṣaktikām || 4

yo jāgaret smṛtimāṃ saṃprajānaḥ
samāhito mudito viprasannaḥ |
kālena dharmāṃ mīmāṃsa­mānaḥ
so ’tikramej jātijarāṃ saśokām || 5

tasmāt sadā jāgarikāṃ bhajeta
yo vīryavāṃ smṛtimān apramattaḥ |
saṃyojanaṃ jātijarāṃ ca hitvā
ihaiva duḥkhasya karoti so ’ntam || 6

jā­garantaḥ śṛṇudhvaṃ me
suptāś ca pratibudhyata
supteṣu jāgaraṃ śreyā
na hi jāgarato bhayam || 7

jāgaryam anuyuktānām
ahorātrānuśikṣiṇāṃ |
amṛtaṃ cādhimuktānām
astaṃ gacchanti āsravāḥ || 8

Iābhas teṣāṃ manuṣyāṇāṃ
ye buddhaṃ śaraṇaṃ gatāḥ |
yeṣāṃ divā ca rātrau ca
nityaṃ buddhagatā smṛtiḥ || 9

lābhas teṣāṃ manuṣyāṇāṃ
ye dharmaṃ śaraṇaṃ gatāḥ |
yeṣāṃ divā ca rātrau ca
nityaṃ dharmagatā smṛtiḥ || 10

lābhas teṣāṃ manuṣyāṇāṃ
ye saṃghaṃ śaraṇaṃ gatāḥ |
yeṣāṃ divā ca rātrau ca
nityaṃ saṃghagatā smṛtiḥ || 11

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
nityaṃ buddhagatā smṛtiḥ || 12

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
nityaṃ dharmagatā smṛtiḥ || 13

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
nityaṃ saṃghagatā smṛtiḥ || 14

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
nityaṃ kāyagatā smṛtiḥ || 15

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
nityaṃ samādhayaḥ smṛtāḥ || 15A

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
nityaṃ śīlagatā smṛtiḥ || 16

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
nityaṃ tyāgagatā smṛtiḥ || 16A

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
nityaṃ devagatā smṛtiḥ || 16B

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau caiv
āhiṃsāyāṃ rataṃ manaḥ || 17

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau caiv
āvyāpāde rataṃ manaḥ || 18

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
naiskramye ’bhirataṃ manaḥ || 19

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
nityaṃ dhyānarataṃ manaḥ || 20

supra­buddhaṃ prabudhyante
ime gautamaśrāvakāḥ |
yeṣaṃ divā ca rātrau ca
viveke ’bhirataṃ manaḥ || 21

supra­buddhaṃ prabudhyante
ime gautamasrāvakāḥ |
yeṣāṃ diva ca rātrau ca
śunyatāyāṃ rataṃ manaḥ || 22

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau caiv
ānimitte rataṃ manaḥ || 23

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
ākiñcanye rataṃ manaḥ || 24

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
bhāvanāyāṃ rataṃ manaḥ || 25

supra­buddhaṃ prabudhyante
ime gautamaśrāvakāḥ |
yeṣāṃ divā ca rātrau ca
nirvāṇo ’bhirataṃ manaḥ || 26

|| smṛtivargaḥ || ||