kāyapradoṣaṃ rakṣeta
syāt kāyena susaṃvṛtaḥ |
kāyaduścaritaṃ hitvā
kāyena sukṛtaṃ caret || 1

vācaḥ pradoṣaṃ rakṣeta
vacasā saṃvṛto bhavet |
vāco duścaritaṃ hitvā
vācā sucaritaṃ caret || 2

manaḥpradoṣaṃ rakṣeta
manasā saṃvṛto bhavet |
manoduścaritaṃ hitvā
manaḥsucaritaṃ caret || 3

kāyaduścaritaṃ hitvā
vacoduścaritāni ca |
manoduścaritaṃ hitvā
yac cānyad doṣasaṃhitam || 4

kāyena kuśalaṃ kuryād
vacasā kuśalaṃ bahu |
manasā kusalaṃ kuryād
apramāṇaṃ niraupadhim || 5

kāyena kuśalaṃ kṛtvā
vacasā cetasāpi ca |
iha cātha paratrāsau
sukhaṃ samadhigacchati || 6

ahiṃ­sakā vai munayo
nityaṃ kāyena saṃvṛtāḥ |
te yānti hy acyutaṃ sthānaṃ
yatra gatvā na śocati || 7

ahiṃ­sakā vai munayo
nityaṃ vācā susaṃvṛtāḥ |
te yānti hy acyutaṃ sthānaṃ
yatra gatvā na śocati || 8

ahiṃ­sakā vai munayo
manasā nityasaṃvṛtāḥ |
te yānti hy acyutaṃ sthānaṃ
yatra gatvā na śocati || 9

kāyena saṃvṛtā dhīrā
dhīrā vācā susaṃvṛtāḥ |
manasā saṃvrtā dhīrā
dhīrāḥ sarvatra saṃvṛtāḥ |
te yānti hy acyutaṃ sthānaṃ
yatra gatvā na śocati || 10

kāyena saṃvaraḥ sādhu
sādhu vācā ca saṃvaraḥ |
manasā samvaraḥ sādhu
sādhu sarvatra saṃvaraḥ |
sarvatra saṃvṛto bhikṣuḥ
sarvaduḥkhāt pramucyate || 11

vācānurakṣī manasā susaṃvṛtaḥ
kāyena caivākuśalaṃ na kuryāt |
etāṃ śubhāṃ karmapathāṃ viśodhayann
ārādhayen mārgaṃ ṛṣipraveditam || 12

|| sucaritavargaḥ || ||